O Goberno publica a “Estratexia nacional de fomento do deporte contra o sedentarismo e a inactividade física” para o período 2025-2030
O CSD destinará 87 millóns de euros do seu orzamento ordinario durante o período 2025-2030 ao desenvolvemento das actuacións previstas nesta estratexia
-
Estará dotada dun orzamento de 87 millóns de euros e o seu desenvolvemento estará coordinado polo Consello Superior de Deportes (CSD) en colaboración con outros departamentos da Administración Xeral do Estado.
-
“Queremos que España sexa un país no que ser fisicamente activo sexa a norma e non o comportamento extraordinario”, subliñou a ministra de Educación, Formación Profesional e Deportes, Pilar Alegría.
Madrid, 17 de decembro de 2024.- O Goberno publica este martes a “Estratexia nacional de fomento do deporte contra o sedentarismo e a inactividade física”, unha iniciativa coordinada polo Ministerio de Educación, Formación Profesional e Deportes a través do Consello Superior de Deportes (CSD), que ten como finalidade mellorar a saúde e o benestar das cidadás e cidadáns do noso país.
Con esta Estratexia, deseñada para o período 2025-2030 e dotada con 87 millóns de euros, o Goberno de España asume o compromiso de achegar as ferramentas e os medios necesarios para que toda a poboación española teña un mellor acceso á práctica de actividade física e deportiva de calidade e segura, aumentando así os niveis de actividade físico-deportiva.
“Queremos que España sexa un país no que ser fisicamente activo sexa a norma e non o comportamento extraordinario e no que as súas cidadás e cidadáns vivan nunha sociedade que facilite, promova e apoie un modo de vida activo e saudable”, asegurou a ministra de Educación, Formación Profesional e Deportes, Pilar Alegría.
O CSD destinará 87 millóns de euros do seu orzamento ordinario durante o período 2025-2030 ao desenvolvemento das actuacións previstas nesta estratexia, que contempla unha proposta integral para o fomento do deporte e para a loita contra o sedentarismo e a inactividade física.
Nela profúndase inicialmente nunha análise da importancia e o impacto da promoción dunha vida activa. A seguir, realízase unha análise do marco lexislativo e normativo de referencia no contexto internacional. Despois, defínese a visión, misión e valores. Por último, o documento aborda detalladamente diferentes liñas estratéxicas cos seus respectivos eixos de intervención e accións específicas.
A “Estratexia nacional de fomento do deporte contra o sedentarismo e a inactividade física”, aprobada polo Consello de Ministros, desenvolve os seus obxectivos e accións en consonancia coas directrices da Estratexia de Actividade Física para a Rexión Europea da OMS 2016-2025 (OMS Oficina Rexional Europea, 2016) e constrúese en base a cinco liñas estratéxicas: o contexto escolar, a área da saúde, o medio ambiente e o desenvolvemento sustentable, as contornas laborais e a promoción da igualdade, a inclusión e a integración social.
Esta Estratexia, prevista dentro do Compoñente 26 do Plan de Recuperación, Transformación e Resiliencia, pretende así mesmo involucrar ás Administracións a nivel estatal, autonómico e local, así como aos axentes intervenientes no sistema deportivo nacional, sendo o CSD o seu impulsor principal.
Un Goberno comprometido co deporte e a saúde
Coa publicación desta Estratexia, o Goberno de España reafirma a súa aposta polo fomento da práctica de actividade física e deportiva co propósito de fomentar hábitos de vida activos que melloren a calidade de vida da cidadanía.
Segundo a Organización Mundial da Saúde, unha actividade física regular axuda a previr as enfermidades non transmisibles como as cardiopatías, os accidentes cerebrovasculares, a diabetes e algúns tipos de cancro. Ademais, pode previr a hipertensión, o sobrepeso e a obesidade á vez que mellora a saúde mental, a calidade de vida e o benestar.