O presidente do Goberno despide á Selección de Baloncesto que asistirá á Copa do Mundo en China
Nun acto celebrado no Centro de Alto Rendemento do CSD en Madrid
Madrid, 23 de agosto de 2019.- O presidente do Goberno en funcións, Pedro Sánchez, reuniuse esta mañá na sede do Consello Superior de Deportes cos integrantes da selección española de baloncesto masculino, que mañá parten cara a China para participar na XVIII Edición da Copa Mundial de Baloncesto da FIBA.
Sánchez, que estivo acompañado do ministro de Cultura e Deporte, José Guirao, da Secretaria de Estado para o Deporte, María José Renda, e do presidente da Federación Española de Baloncesto, Jorge Garbajosa, trasladoulles o apoio de todo o Goberno.
Durante a súa intervención o presidente en funcións manifestou a súa “enorme gratitude e respecto” á selección e reivindicou a calidade do equipo, de quen destacou o seu compromiso e o traballo ben feito, non só dos xogadores, senón tamén da canteira e de todo o corpo técnico co seleccionador á cabeza.
Os doce xogadores elixidos por Sergio Scariolo para representar a España na XVIII edición da Copa do Mundo FIBA 2019 ultimarán a súa preparación en China con dous encontros amigables, os días 27 e 28, fronte ás seleccións de Arxentina e Rusia, respectivamente. A Selección Española inicia a súa participación na Copa do Mundo o próximo 31 de agosto enfrontándose á Selección de Tunes.
Durante o acto, o presidente da Federación de Baloncesto fixo entrega a Pedro Sánchez dunha réplica da medalla de ouro que recibiron as xogadoras da selección feminina tras gañar o Eurobasket 2019 en Serbia.
Fotos:@NPhoto-AlbertoNevado/FEB