Comunicado Oficial: O CSD estima a medida cautelar urxente solicitada polo FC Barcelona e polos xogadores Dani Olmo e Pau Víctor

Madrid, 8 de xaneiro de 2025.-  O Consello Superior de Deportes (CSD) estimou este mércores a medida cautelar urxente solicitada polo FC Barcelona e polos xogadores Dani Olmo e Pau Víctor. 

Esta medida, que ten un carácter provisional ata que se resolva definitivamente o recurso de alzada presentado polo club e os citados futbolistas, suspende o Acordo da Comisión de Seguimento do Convenio de Coordinación RFEF-LaLiga, con data do 4 de xaneiro de 2025, e a cancelación das licenzas deportivas dos referidos xogadores. Así mesmo, mantén a vixencia de tales licenzas ata que se resolva definitivamente o presente recurso. 

Para a estimación desta medida cautelar urxente, o CSD analizou o recurso de alzada, de 52 páxinas, e os máis de 60 documentos que o acompañan. Na súa argumentación, o FC Barcelona, Dani Olmo e Pau Víctor sinalan que á Comisión de Seguimento atribúenselle exclusivamente as funcións de interpretación da aplicación das cláusulas do Convenio de Coordinación RFEF-LaLiga, vixiar o cumprimento do pactado e promover cantas outras actividades tendan á maior eficacia do Convenio. 

Cuestionan, por tanto, que a Comisión de Seguimento teña competencias para conceder ou non conceder o visado previo nin a licenza definitiva dos xogadores de fútbol profesional, apreciando indicios de nulidade de pleno dereito no Acordo da Comisión de Seguimento do Convenio de Coordinación RFEF-LaLiga. 

Sen prexuízo das alegacións que se soliciten para a resolución do fondo do asunto, o CSD observou a posible concorrencia dunha causa de nulidade de pleno dereito e a existencia de prexuízos inmediatos e de difícil reparación, que afectarían os dereitos recoñecidos na vixente Lei do Deporte aos futbolistas Dani Olmo e Pau Víctor e á súa seguridade xurídica. 

Nese sentido, o CSD valorou que, segundo o artigo 27 da Lei do Deporte, os deportistas profesionais teñen dereito “a unha carreira deportiva conforme as súas potencialidades” e con todas as garantías e certeza. 

Nestes momentos, o FC Barcelona e os seus xogadores están inmersos na Supercopa de España, primeiro título oficial da tempada, de visibilidade e repercusión mundial e no que só participan os equipos que tiveron mellor rendemento nas competicións nacionais no curso anterior. 

O CSD considera que a non adopción desta medida cautelar causaría un prexuízo económico e deportivo grave para o club e, sobre todo, para os futbolistas. Isto podería danar tamén os intereses da selección española, así como do resto das competicións nacionais, incluída LaLiga. 

Por último, o CSD subliña que este pronunciamento non supón prexulgar as cuestións de fondo expostas no recurso.