Laia Palau recibirá a Gran Cruz da Real Orde do Mérito Deportivo

Madrid, 28 de decembro. - O Consello de Ministros, a proposta do ministro de Cultura e Deporte, Miquel Iceta, aprobou este martes o real decreto polo cal se acorda conceder a Gran Cruz da Real Orde do Mérito Deportivo á xogadora de baloncesto Laia Palau. A base, que o pasado mes de novembro anunciou a súa retirada da Selección española, súmase así ao selecto grupo de deportistas que ostentan a maior condecoración do Estado en materia de deporte, entre os que figuran Rafa Nadal, Arantxa Sánchez Vicario, Xavi, David Cal ou, o máis recente, Pau Gasol.

Nada en Barcelona en 1979 e actualmente nas filas do UNI Xirona, Palau acumula un palmarés no que, entre outras, destacan tres medallas de ouro, unha de prata e catro de bronce no Campionato Europeo de Baloncesto Feminino; unha prata e dous bronces no Mundial; e unha prata nos Xogos Olímpicos de Río de 2016.

Internacional absoluta desde 2002 e capitá da Selección feminina de baloncesto desde 2014, Palau é a deportista española que máis veces vestiu a elástica do conxunto nacional representando a España -un total de 314 partidos- e tamén a que máis veces subiu a un pódium de baloncesto. A nivel de clubs xogou no CBF Universitat de Barcelona, Bourges Basket, Ros Casares Valencia, CCC Polkowice, ZVVZ USK Praga e no UNI Xirona.

Por todos estes méritos, Laia Palau é considerada a mellor xogadora española de baloncesto e a gran capitá da selección.

Real Orde do Mérito Deportivo

Creada en 1982, a Real Orde do Mérito Deportivo supón un recoñecemento público a quen se distinguiron en materia da práctica do deporte, no fomento e ensino da educación física ou na investigación, difusión, organización e desenvolvemento da cultura física e o deporte. A súa maior distinción é a Gran Cruz, que se confire mediante real decreto acordado en Consello de Ministros, ademais das medallas de ouro, prata e bronce, que outorga o presidente do Consello Superior de Deportes (CSD).