O CSD e Iberdrola renovan o acordo para impulsar á muller no ámbito deportivo

Madrid, 15 de xullo de 2019. O programa Universo Muller do Consello Superior de Deportes e a compañía Iberdrola continuarán colaborando para impulsar a participación da muller no ámbito deportivo. O ministro de Cultura e Deporte en funcións, José Guirao, e o presidente de Iberdrola, Ignacio Galán, asinaron este luns a renovación deste acordo de colaboración que axuda a 16 federacións deportivas.

O programa Universo Muller do CSD foi recoñecido polo Goberno como un Acontecemento de Excepcional Interese Público e ten como obxecto a promoción e o incremento da participación das mulleres en todos os ámbitos deportivos, contribuíndo así á mellora e transformación social a través dos valores do deporte.

A colaboración de Iberdrola con Universo Muller supón unha axuda para 16 federacións deportivas: Ximnasia, Tríatlon, Rugby, Piragüismo, Bádminton, Fútbol, Balonmán, Voleibol, Hockey, Tenis de mesa, Atletismo, Kárate, Boxeo, Surf, Deportes de xeo e Esgrima. Ademais, dá nome a 22 ligas nacionais de máxima categoría de diferentes deportes e a outras 35 competicións.

Ata agora a unión entre Universo Muller e Iberdrola incrementou o nivel das competicións, permitiu o retorno a España de deportistas de alto nivel, mellorou a capacidade de competir dos clubs e potenciou a visibilidade da muller deportista.  

Para o ministro de Cultura en funcións, o deporte feminino “está a remover conciencias, chegando a posicións que, fai non moito, parecían moi afastadas. Desde o Goberno redactamos a nova Lei do Deporte que recolle, entre outras cousas, a profesionalización do deporte feminino, a igualdade de premios, axudas á maternidade e a favor da conciliación e a integración igualitaria nos órganos de dirección das entidades deportivas.”

Guirao sinalou tamén que a Cultura e o Deporte enriquécense mutuamente. “O traballo en equipo, a constancia ou o esforzo son valores que a Cultura, que o fai de forma máis diluída, pode potenciar aprendendo do deporte. A firma de hoxe é facer visible unha traxectoria, é unha magnífica ocasión para dicir que imos polo bo camiño, que estamos a traballar ben, que o que se conseguiu era un soño hai uns anos, pero que a nosa capacidade para soñar é infinita e imos seguir facéndoo.”

Ao evento, celebrado hoxe no Centro de Alto Rendemento de Madrid, asistiron tamén a presidenta do Consello Superior de Deportes e secretaria de Estado para o Deporte, María José Renda, así como embaixadoras do programa Universo Muller, Anabel Medina e Eva Calvo; presidentes e deportistas representantes das 16 federacións que se benefician do acordo. Entre elas, Silvia Navarro, Celia Jiménez, Sara Furtado, María López, Carolina Marín ou Maialen Chourraut.  

Acontecementos de Excepcional Interese Público

O programa Universo Muller é un do catro proxectos deportivos que impulsa o CSD, dependente do ministerio de Cultura e Deporte, que foi recoñecido como Acontecemento de Excepcional Interese Público. Tamén teñen este recoñecemento ADB2020, Novas Metas e Deporte Inclusivo. Son ferramentas que fan crecer o deporte á vez que transforman a sociedade, facéndoa máis xusta, máis igualitaria e máis inclusiva.

Ligazón de descarga de imaxes: https://www.flickr.com/photos/149228308@N03/albums/72157709654560497