Rodríguez Uribes subliña o compromiso do CSD para o cumprimento do “Decálogo da axenda política paralímpica”

O presidente do Consello Superior de Deportes, José Manuel Rodríguez Uribes, interveu no Congreso dos Deputados na presentación do “Decálogo da axenda política paralímpica”, unha batería de medidas impulsadas polo Comité Paralímpico Español e o CERMI para promover avances no deporte de persoas con discapacidade no período 2025-2028.

Madrid, 1 de xullo de 2025.- O presidente do Consello Superior de Deportes (CSD), José Manuel Rodríguez Uribes, interveu este martes no Congreso dos Deputados no acto de presentación do “Decálogo da axenda política paralímpica”, unha iniciativa do Comité Paralímpico Español (CPE) e o Comité Español de Representantes de Persoas con Discapacidade (CERMI) para promover avances no deporte practicado por persoas con discapacidade durante o período 2025-2028.

Durante a súa exposición, acompañando ao presidente do CPE, Alberto Durán, e ao de CERMI, Luís Cayo Pérez, Rodríguez Uribes subliñou o compromiso o Goberno de España para seguir promovendo melloras neste ámbito nos próximos anos, nos que se dará continuidade á liña de traballo desenvolvido durante o ciclo entre os Xogos de Tokio e París.

“A realidade dos últimos anos na loita polos dereitos das persoas con discapacidade no deporte é unha loita de éxito”, sinalou o presidente do CSD. 

Entre os principais avances, Rodríguez Uribes sinalou a reforma da Constitución, co fin de “eliminar os obstáculos para que a igualdade sexa real e efectiva”; a equiparación do valor económico das medallas entre deportistas olímpicos e paralímpicos, “unha conquista fundamental, cun gran valor simbólico”; a Lei do Deporte, “a máis avanzada do mundo en termos de discapacidade”; e a importante modernización de instalacións deportivas impulsada polo Goberno, para facelas máis accesibles. 

O presidente do CSD lembrou que “o deporte é un dereito”, o que “xera obrigas correlativas no conxunto da sociedade e é unha garantía de que avanzaremos”. 

Rodríguez Uribes anunciou tamén a próxima celebración da Conferencia Sectorial do Deporte coas Comunidades Autónomas, na que o deporte paralímpico terá unha atención prioritaria como eixo de transformación social.

A grandes liñas, o decálogo de actuación CPE / CERMI persegue que toda política deportiva debe ter en consideración ás persoas con discapacidade dunha maneira transversal en todas e cada unha das propostas que se fagan, pero tamén fomentar medidas específicas de discriminación positiva ou de promoción da inclusión en todos os niveis, desde o deporte de base, lecer e recreación ata o alto nivel, pasando polo deporte federado e de competición.

O decálogo persegue dar continuidade ao proceso de inclusión dos deportistas con discapacidade en todas as federacións deportivas impulsado pola Lei do Deporte; avanzar na eliminación de diferenzas en criterios de acceso a axudas; mellorar a regulación técnica de condicións de accesibilidade das instalacións deportivas; mellorar as fórmulas de financiamento e redución de custos de material deportivo específico; promover a educación inclusiva nas escolas e a infancia; e desenvolver un marco fiscal adecuado e estable para os patrocinios en favor do deporte de persoas con discapacidade, entre outras medidas.

Imaxes dispoñibles para uso editorial en: https://flic.kr/s/aHBqjCjYs6