O CSD estima o recurso de Dani Olmo e Pau Víctor e do FC Barcelona

• O acordo adoptado pola Comisión de Seguimento do Convenio de Coordinación RFEF-LaLiga é nulo de pleno dereito por carecer o este órgano de competencia para denegar o visado previo e a licenza federativa.

Madrid, 3 de abril de 2025.- O Consello Superior de Deportes (CSD) estimou este xoves o recurso de alzada presentado o pasado 7 de xaneiro polos futbolistas Dani Olmo e Pau Víctor e polo FC Barcelona, anulando o acordo da Comisión de Seguimento do Convenio de Coordinación RFEF-LaLiga.

Constatouse dun modo evidente e incontrovertido ao longo deste procedemento, e tras atender as alegacións das partes, a incompetencia da Comisión de Seguimento para decidir acerca do visado previo, así como da licenza solicitada polo FC Barcelona.

As funcións da mencionada Comisión veñen expostas, expresamente, no vixente convenio de coordinación entre a RFEF e LaLiga. Concretamente, o apartado XIX do Título V atribúelle as funcións de:

• Interpretación da aplicación das cláusulas do Convenio.
• Vixilancia do cumprimento do pactado.
• Promoción de actividades que tendan á maior eficacia do Convenio.

Nas súas alegacións, LaLiga e a RFEF defenden que a Comisión de Seguimento non adoptou o acordo, senón que confirmou ou ratificou outros acordos previos adoptados polos órganos competentes.

Con todo, da lectura do acordo impugnado despréndese de forma clara e palmaria que a Comisión de Seguimento nin confirmou, nin ratificou, nin executou os acordos adoptados por LaLiga ou pola RFEF, senón que acordou de forma expresa “non conceder o visado previo nin a licenza definitiva solicitada polo FC Barcelona para os xogadores Dani Olmo e Pau Víctor”.

Nulidade de pleno dereito

Por non ter atribuídas talles competencias, nin tratarse da confirmación ou ratificación de acordos válidos previos, a decisión da Comisión de Seguimento de non conceder o visado previo nin a licenza debe ser considerada nula de pleno dereito.

En Dereito, tan importante é o fondo e a xustificación material das decisións, como as formas, os procedementos e as competencias.

Que era necesario un pronunciamento por parte do órgano adecuado despréndese do manifestado pola propia asesoría legal da RFEF ao subliñar que a súa opinión “non prexulga as decisións que no seu caso puidesen adoptar os órganos eventualmente competentes”.

As licenzas de Dani Olmo e Pau Víctor seguen en vigor

Con esta resolución, ambos os xogadores manteñen a súa licenza en vigor. Isto é así porque a Real Federación Española de Fútbol (RFEF) recoñeceu, así mesmo, nas súas alegacións que “non existe ningunha resolución federativa que acordase a cancelación das licenzas”, circunstancia esixida pola propia RFEF na súa resolución do 30 de xuño de 2022.

En todo caso, a carreira profesional de Dani Olmo e Pau Víctor estivo protexida desde o pasado 8 de xaneiro pola medida cautelar urxente que concedeu o CSD co único interese de evitar un dano irreparable ata a resolución deste procedemento.

O CSD non entra a valorar o control económico exercido por LaLiga

Por último, o CSD desexa subliñar que este recurso non trata sobre o control económico que LaLiga realiza aos seus clubs asociados.

Estas funcións corresponden ao Órgano de Validación de Orzamento de LaLiga e, en segunda instancia, ao seu Comité de Control Económico.

Se o Órgano de Validación de Orzamento de LaLiga validou a operación económica o 3 de xaneiro de 2025 e, en datas posteriores, o mesmo órgano manifesta unha posición distinta sobre a mesma operación, trátase dunha cuestión de índole económica e de regras internas que deberá ser tratada, no seu caso, no ámbito propio de LaLiga.

En definitiva, por razóns de incompetencia, por non seguir os procedementos adecuados establecidos nas normas e por non tratarse do órgano lexitimado para tomar as decisións, o acordo da Comisión de Seguimento do Convenio de Coordinación RFEF-LaLiga debe ser considerado nulo de pleno dereito e todos os efectos derivados dela invalidados.