As gañadoras do programa ‘Embaixadora por un día’ visitan o CSD para coñecer as políticas públicas que favorecen o liderado feminino no deporte
As mozas percorreron o CAR de Madrid acompañadas polo embaixador británico en España, Alex Ellis
Madrid, 21 de febreiro de 2025.- As quince mozas entre 16 e 18 anos gañadoras do programa “Embaixadora por un día”, impulsado pola Embaixada Británica, visitaron este venres o Consello Superior de Deportes (CSD) para coñecer as políticas públicas que están a favorecer o liderado feminino no deporte.
A xornada iniciouse cun conversatorio sobre “Liderado feminino no deporte” no que participaron a subdirectora adxunta de Alta Competición do CSD, Lola Boyé, o subdirector xeral de Ciencias do Deporte, Iñaki Melendro, e a psicóloga do programa de atención ao deportista de alto nivel (PROAD), Sandra Tabasco, así como a seleccionadora de ciclismo paralímpico da Real Federación Española de Ciclismo, Begoña Luís; a exdeportista Sonia Lafuente, adxunta á dirección técnica da Real Federación Española de Atletismo; Nicolás Battaglia en representación de ADESP; e a directora do seminario permanente de Muller e Deporte, Elida Alfaro.
Tras a mesa redonda, as mozas visitaron as instalacións do Centro de Alto Rendemento de Madrid, onde puideron presenciar algúns adestramentos e ter contacto directo con algunhas deportistas.
Durante a visita estiveron acompañadas polo embaixador, Alex Ellis, quen destacou a importancia de iniciativas como esta, que “rompen barreiras, desafian estereotipos e dan visibilidade a referentes femininos, inspirando ás xeracións máis novas”.
O deporte foi o eixo central da terceira edición de “Embaixadora por un día”, un proxecto no que tamén participaron as embaixadas de Alemaña, Australia, Bélxica, Canadá, Irlanda, Xapón, México, Nova Zelandia, Países Baixos, Suíza e Ucraína e que brinda ás adolescentes unha plataforma para explorar o seu potencial.
O deporte é un motor para empoderar ás novas e, máis aló da saúde física, ofrece beneficios como unha maior autoestima e confianza. Pero, segundo a UNESCO, o 49% das mozas abandonan o deporte durante a adolescencia. Por iso, é crucial garantir a igualdade de oportunidades no deporte a través das políticas públicas deportivas, que en España lidera e impulsa o Consello Superior de Deportes.
Imaxes dispoñibles para uso editorial en: https://flic.kr/s/aHBqjC3daE